Научниците од Кралската ботаничка градина (RBG) Kew и партнерите открија нов вид палми и го нарекоа Pinanga subterranea, a нејзиното име доаѓа од латинскиот збор за подземје.
Видот е добро познат на локалното население на тропскиот остров Борнео во Југоисточна Азија, кои сакаат да го грицкаат неговото светлоцрвено слатко и сочно овошје. Растението го откриле научници кои опишале околу 300 видови палми на островот.
„Ги проучувам палмите 30 години и сум изненаден како тие продолжуваат да нè изненадуваат“, вели Вилијам Бејкер, виш менаџер за истражување во Tree of Life во RBG Kew.
„Ова неочекувано откритие покренува многу повеќе прашања отколку што дава одговори. Што ја опрашува палмата? Како опрашувачот наоѓа цвеќиња под земја? Како еволуирал овој феномен и со што друго палмите ќе нè изненадат?“
Добро им е позната на жителите на Борнео
Pinanga subterranea се придружува на повеќе од 2.500 видови палми познати на науката, од кои на половина им се заканува истребување.
Палмата може да се најде расфрлана низ прашумите на западен Борнео, поминувајќи ги државните граници од Саравак во Малезија до Калимантан во Индонезија. Пред научниот опис, растението имало име на неколку локални јазици: Pinang Tanah, Pinang Pipit, Muring Pelandok и Tudong Pelandok.
И покрај тоа што е добро познат на луѓето од Борнео, видот е целосно занемарен од научната заедница и тоа ја истакна потребата за поблиска соработка со домородните заедници.
За присуството на растението првпат научниците ги предупреди коавторот на студијата Пол Чаи, малезиски ботаничар и истоименик на видот палми Pinanga chaiana. Тој за прв пат се сретнал со палмата во 1997 година додека ги чистел густите лисја околу младата палма за да добие подобра слика за неа.
Имаше неколку растенија, но само едно со плод.
Извор: 021.rs
