Од 10 април Европската Унија ќе започне со примена на нов систем за контрола на влез и излез на патници, со кој повеќе нема да се ставаат печати во пасошите. Наместо тоа, податоците за патниците ќе се евидентираат дигитално, преку фотографија и отпечатоци од прсти.
Станува збор за систем кој ќе важи за државјани од земји кои не се членки на ЕУ, меѓу кои се и граѓаните од регионот. При секое влегување во Унијата, ќе се земаат биометриски податоци, што ќе овозможи попрецизна контрола на престојот и спречување на злоупотреби.
Со новиот систем ќе се бележи точниот датум на влез и излез, како и времетраењето на престојот, со што ќе се олесни следењето дали некој го надминал дозволениот престој во ЕУ. Оваа промена има за цел да ја зголеми безбедноста и ефикасноста на граничните контроли, но и да го модернизира целиот процес.
Иако системот треба да ја забрза контролата на границите на долг рок, во почетната фаза се очекуваат задржувања додека патниците и службите се прилагодуваат на новиот начин на регистрација.
