„Игри на светлината“, актови и портрети e новата изложба на фотографии на Владимир Георгиев која ќе биде отворена утре вчер во галеријата на Младинскиот културен центар, МКЦ. Ќе бидат изложени 39 фотографии во голем формати кои ја отсликуваат убавината на женското тело. Овие фотографии се повеќе од визуелни претстави. Тие се израз на индивидуалност, убавина, емоции, интимност и независност. Актовите не се само естетски прикази. Тие носат подлабоко значење, истражувајќи теми како идентитет, моќ, сексуалност и општествени норми. И додека понекогаш се соочуваме со предизвикот на објективизација, актовите во уметноста можат да бидат и простор за ослободување, рефлексија и подлабоко разбирање на женската природа.
-Изложбата не е толку смела има многу посмели работи, но актот е некако најатрактивно нешто за гледање. По убаво женско тело и жени се вртат. Мислам таа архитектура што Господ или природата ја направила кај човекот ја претставувам во најубаво светло. Тоа што јас го правам го кажува и името на изложбата, „Игри на светлината“. Разликата од порно и од уметничка фотографија е само светлото. Значи со било кое женско тело може и едното и другото да се направи, ако осветлиш на еден или на друг начин. Јас ја бирам уметноста. На моите фотографии дури и нема ни еротика. Иако се голи. Јас се враќам на уметничко видување на женско тело – вели Владо.
Концептот на изложбата која ќе биде претставена утревечер, се актови и портрети. Одбрани се интересни техники на осветлување, атрактивни за гледање. Нема мода, вели Владо, едноставно женственост.
– Секоја жена носи своја внатрешна енергија. И со оваа изложба сакав да ја истакнам нејзината духовност, истата таа енергија. Со еден збор женственост. И со портретите и со актовите – објаснува Владо за Трн.
Кога зборуваме за голото женско тело, зборуваме за табуата. Колку тие и денес се присутни кај нас.
-Од една страна ги поминавме некои табуа, од друга страна некои табуа уште стојат непроменети, значи Балканот е многу тежок терен за фотографирање такви работи. И затоа сум многу благодарен на моите модели кои што одлучија да ми позираат. Од таа причина моите фотографии немаат идентитет. Мислам дека треба да се сменат генерации. Сеуште кога ќе видат фотографија од акт прашуваат која е оваа? Јас колку што знам, еве 40 години сум со фотоапарат, таа тема и тоа табу не е сменето. До сега не сум фотографирал акт кај што има и лик- вели Владо.
Изложбата ќе продолжи не само во Македонија, туку и надвор. Веќе има предлози таа да биде поставена во Софија, Москва, Брисел, Чикаго, Њујорк, Парис… А тука некаде е и инспирацијата за следната изложба и повторно – игри со светлина.
