Свеченото поставување и откривање на скулптурата ќе се одржи на 16 мај, во Рокенрол тематскиот парк.
Скулптурата на Дивљан ќе биде сместена меѓу бистите на некои од најголемите имиња од домашната и светската музичка сцена – меѓу кои се Бранимир Штулиќ, Дино Дворник, Рамоунс, Џек Вајт, Дејвид Боуви, Пети Смит и други.
Влада Дивљан (1958–2015) остави длабока трага како фронтмен на легендарниот белградски бенд Идоли, но и како самостоен автор, композитор и истражувач на нови музички хоризонти. Неговата уметност ја обединуваше нежноста и интелектуалната префинетост со бунтовниот дух на новиот бран. Со песни како Retko te viđam sa devojkama, Maljčiki, Odbrana i poslednji dani и многу други, Дивљан остави неизбришлив белег врз неколку генерации слушатели, а неговото влијание и денес е присутно низ целиот регион.
Поставувањето на оваа скулптура претставува симболично враќање на Дивљан меѓу своите – меѓу уметниците што ја менувале и обликувале музичката историја, но и меѓу луѓето кои никогаш не го заборавија.
Превземено од Јане Алтипармаков
