Онлајн енциклопедијата Википедија објави дека склучила нови договори со големи технолошки компании за вештачка интелигенција, меѓу кои Amazon, Meta и Microsoft. Партнерствата се дел од комерцијалниот производ Wikipedia Enterprise, кој им овозможува на AI-компаниите легално да ја користат и дистрибуираат содржината на Википедија.
Основачот на Википедија, Џими Вејлс, изјави дека големите јазични модели „ги преоптоваруваат серверите“ на платформата и дека е време компаниите што заработуваат од вештачка интелигенција да придонесат финансиски.
Фондацијата Викимедија, непрофитната организација што стои зад Википедија, нагласува дека донациите од корисниците се наменети за бесплатен пристап за читателите, а не за финансирање на комерцијален развој на AI-технологии.
„Луѓето не донираат за да ги субвенционираат огромните AI-компании“, додаде Вејлс.
Автоматизираните системи, особено големите јазични модели, денес се меѓу најголемите корисници на содржината на Википедија, што создава постојан технички притисок врз инфраструктурата. Според извршната директорка на Фондацијата Викимедија, Меријана Искандер, истражувањата покажуваат дека корисниците сè повеќе се потпираат на Википедија – паралелно со растот на AI-алатките кои исто така ја користат како извор.
Википедија веќе има договор со Google од 2022 година, како и со помали AI-компании како Anthropic, Perplexity и француската Mistral AI.
Пораката од Википедија е јасна: вештачката интелигенција се потпира на човечки уредено знаење, а оние што го користат треба фер да учествуваат во трошоците за негово одржување.
