Виетнам ја укина својата политика за две деца за да се справи со проблемите со популацијата, откако земјата од Југоисточна Азија забележа пад на наталитетот, објави агенцијата Анадолу.
Пратениците во Постојаниот комитет на Националното собрание ги одобрија измените на законот за население во вторник, објави дневниот весник „Ханаој тајмс“.
„Ажурираниот закон им овозможува на паровите слободно да одлучуваат за времето, бројот и растојанието помеѓу децата, земајќи ги предвид нивната возраст, здравје, образование, работа, приход и капацитет за одгледување деца, сето тоа врз основа на принципот на еднаквост“, рече министерот за здравство Дао Хонг Лан.
Таа додаде дека реформата има за цел да се справи со растечките разлики во стапките на наталитет меѓу регионите и социјалните групи и да се спречи падот на населението под нивото потребно за генерациска обнова, тренд што го загрозува одржливиот економски и социјален развој на Виетнам, како и неговата национална безбедност и одбрана на долг рок.
Виетнам, земја која има население од нешто повеќе од 100 милиони, досега ги ограничуваше двојките на едно или две деца.
Пратениците се состанаа во вторник на 46-та седница на Постојаниот комитет, кога беа усвоени измени на член 10 од Законот за население, кој првично беше донесен во 2003 година и ревидиран во 2008 година.
Стапката на наталитет нагло опадна, од 1,96 во 2023 година на 1,91 во 2024 година, што е најниската стапка во историјата на земјата.
