Етна, највисокиот и најактивниот вулкан во Европа, моментално повторно еруптира, загрижувајќи ги населението, но и патниците кои планираат да ја посетат Сицилија.
Најновата ерупција започна пред пет дена, исфрлајќи облак пепел и лава видлива на километри околу, пишува EuroNews. Ерупцијата доаѓа од југозападниот кратер Бока Нова, што значи “Нови усни”. Од кратерот тече река лава долга три километри.
При претходните ерупции, блиските места биле покриени со црн вулкански пепел, но оваа предизвикала само минимални нарушувања, а туристите и локалното население на Италија продолжиле да шетаат по вулканот за време на ерупцијата.
Аеродромот Катанија се наоѓа подно планината Етна, нудејќи на патниците кои доаѓаат и заминуваат спектакуларен поглед на вулканот. Познат и како аеродром “Виченцо Белини”, сместен на источниот брег на островот, е најпопуларниот аеродром на Сицилија за меѓународни туристи.
Дел од тој аеродром беше затворен на 12. февруари поради намалена видливост предизвикана од пепелта. Меѓутоа, аеродромот не бил затворен од тогаш, а летовите моментално функционираат нормално. Сепак, управата на аеродромот советува патниците да го проверуваат статусот на својот лет со авио-компанијата пред да тргнат на аеродромот.
Во случај летовите од аеродромот Катанија повторно да бидат нарушени, авио-компаниите се должни да понудат алтернативен лет или рефундација ако летот биде откажан или одложен повеќе од три часа.
