Се појави неверојатна видео-снимка која го прикажува мирниот и самоуверен бегство на двајца крадци од музејот Лувр, веднаш по кражбата на француските кралски драгоцености вредни 88 милиони евра. Видеото, кое брзо стана вирално, открива нови детали за една од најспектакуларните кражби во Франција во последните неколку децении, пишува The Guardian.
Што прикажува снимката?
Во видеото долго 36 секунди, чија автентичност ја потврдил Le Parisien, се гледаат двајца мажи облечени во црно како се спуштаат со надворешен товарен лифт од галеријата „Аполон“, каде што се чуваат некои од највредните експонати во музејот.
Едниот крадец носи жолт рефлектирачки елек, а другиот мотоциклистичка кацига. Се верува дека видеото е снимено од соседен прозорец во музејот, со поглед кон улицата Quai François Mitterrand, каде што крадците претходно го паркирале украдениот камион со скали долг 30 метри, кој го користеле за да влезат во галеријата на првиот кат.
Во снимката се слуша глас – најверојатно на чувар – кој преку радиоврска вели:
„Лицата се на скутери. Заминуваат, заминуваат.“
Неколку секунди подоцна, крадците се гледаат како бегаат на два скутери, додека друг глас вика: „Проклетство, еве ги – полицијата!“
Кражба за само седум минути
Инцидентот се случил во неделата околу 9:30 часот наутро, веднаш по отворањето на музејот. Двајца од четворицата членови на бандата влегле во галеријата преку разбиен прозорец кој, очигледно, не бил добро обезбеден. Со помош на електрични секачи ги отвориле двете витрини и украле осум парчиња непроценлив накит.
Меѓу украдените предмети се наоѓаат смарагдна и дијамантска огрлица, подарок од Наполеон I за неговата сопруга Марија Лујза, како и тијара што некогаш ѝ припаѓала на царицата Евгенија, сопруга на Наполеон III.
Според француските медиуми, целата операција траела помалку од седум минути, а крадците во самата галерија се задржале само 3 минути и 58 секунди.
Министерот за внатрешни работи Лоран Њуњез потврди дека на случајот работат повеќе од 100 истражители.
Недоволна безбедност
Директорката на Лувр, Лоранс де Кар, во средата признала пред Сенатот дека станало збор за „сериозен пропуст“. Таа потврдила дека покриеноста на надворешните ѕидови со безбедносни камери била „недоволна“, што најверојатно им овозможило на крадците да го изведат планот без големи пречки.
Новата снимка уште еднаш ја разоткрива слабата безбедност во еден од најпознатите музеи во светот. Кражбата од Лувр не само што шокираше јавност, туку повторно го отвори прашањето за тоа колку се заштитени светските културни богатства.
