Двајца пациенти од областа Менхетен во Њујорк со симптоми кои укажуваат на ебола се итно пренесени во болница, пренесуваат медиумите во САД.
Итната помош, чиј медицински тим бил опремен со заштитни одела, утрово ги транспортирала пациентите од ургентниот центар CityMD.
Според пишувањата на медиумите, пациентите пристигнале од Уганда и покажувале симптоми на ебола, но до сега не се направени тестови кои би го потврдиле присуството на вирусот. Тие се пренесени во болницата Bellevue за дополнителни прегледи и медицинска проценка.
Ебола се пренесува директен контакт со телесни течности од заразената личност или контаминирани материјали и се манифестира како тешка хеморагична грозница. Симптомите вклучуваат висока температура, повраќање, дијареа, болки во мускулите, а во некои случаи и внатрешно и надворешно крварење.
Властите сè уште не потврдиле дали се работи за ебола, а дополнителни тестирања ќе покажат дали постои причина за загриженост.
