Вознемирувачки снимки од дрон, објавени од здружението за заштита на животни TideBreakers, ги прикажуваат орката Wikie (23) и нејзиниот 11-годишен син Keijo како бесцелно пливаат во затворените базени на напуштениот парк Marineland Antibes, во близина на Кан. Паркот е затворен на 5 јануари. На снимките се гледаат и базени обраснати со алги, во кои се заробени останатите делфини.
И покрај тоа што условите се очигледно лоши, француските власти сè уште немаат најдено соодветно место во Европа за преселба на орките, отфрлајќи неколку предлози – вклучително и оној за нивно преместување во морски зоолошки парк во Јапонија.
„Ситуацијата во Marineland е итна и бара внимание од целиот свет“, рече коосновачката на TideBreakers, Маркета Шустерова.
„Ова се последните две орки во заробеништво во Франција и мораат итно да се преселат. Сегашните услови претставуваат сериозна закана за нивното здравје и безбедност.“
Забрана и одложувања
Паркот Marineland Antibes беше затворен поради законот донесен во 2021 година, со кој се забрануваат настапи на делфини и китови во заробеништво. Иако не работи веќе, управата на паркот сè уште е законски обврзана да се грижи за животните додека не им се најде траен дом.
Wikie и Keijo се родени во заробеништво и не би можеле да преживеат во дивина.
Одбиени предлози за преселба
Француската влада одби два предлога за преселба – еден во морски зоолошки парк во Јапонија, и друг во засолниште за китови во Канада.
Лори Марино, претседателка на канадскиот проект Whale Sanctuary Project (WSP), изјави дека нивната локација е „единствената преостаната опција“.
Во февруари, француската министерка за екологија, Ањес Паније-Рунашер, најави дека се бара соодветно засолниште во Европа, но до денес не е определено ниту едно.
„Ако сè уште немате локација, сте години далеку од функционално засолниште“, предупреди Марино.
Француските власти тврдат дека долгите патувања се премногу стресни за животните, а обидот за преместување во Лоро Парк на Тенерифе бил одбиен од шпанските власти.
