Повеќе од 20 лица, меѓу кои девет полицајци и еден пожарникар, се повредени по голема експлозија на бензинска пумпа во источен Рим, соопштија италијанските власти.
Веб-страницата „Рома Тудеј“ објави фотографија од огромна топка од пламен и чад што се издига високо кон небото. Одделни фотографии објавени од пожарникарите ја покажуваат бензинската пумпа речиси целосно уништена.
Покрај службените лица, повредени се 16 цивили, вклучувајќи го и раководителот на станицата, изјави шефот на римската полиција Роберто Масучи, повикувајќи се на италијански новински агенции. Тој додаде дека никој не е во опасност од смрт.
Здравствените власти соопштија дека пет лица се хоспитализирани со полесни изгореници и повреди од скршено стакло.
Силната експлозија во дистрибутер на нафта, дизел и течен нафтен гас (LPG) во областа Пренестино се слушнала низ целиот италијански главен град кратко по 8 часот наутро, а се огласи и Папата.
„Се молам за луѓето погодени од експлозијата на бензинска пумпа во срцето на мојата епархија. Со загриженост продолжувам да го следам развојот на овој трагичен инцидент“, напиша папата Лав XIV.
Пожарот се проширил на блискиот магацин, а ударниот бран од експлозијата ги оштетил блиските згради.
Премиерката Џорџија Мелони ја следи ситуацијата, според соопштението од нејзиниот кабинет.
