Еден од најпознатите дневни весници и веб-медиуми во светот, The New York Times, наводно ја одобрил употребата на алатки базирани на вештачка интелигенција (ВИ) кои членовите на редакцијата можат да ги користат за уредување на текстови, сумирање информации, кодирање и пишување содржини.
Во интерен имејл до редакцијата, NYT најавил дека новинарите ќе добијат обука за користење на вештачката интелигенција и го претставил новиот интерен ВИ-алат – Echo, наменет за сумирање содржини од текстови, брифинзи и други активности на компанијата.
Како ќе се користи вештачката интелигенција во NYT?
На новинарите им се испратени нови уреднички насоки кои детално ги објаснуваат сите дозволени употреби на Echo и другите ВИ-алатки што им се достапни. Вработените се охрабруваат да ги користат овие алатки, да предлагаат измени и да ги прилагодуваат за својата работа. ВИ-алатките ќе се користат за:
- Сумирање на текстови
- Креирање промотивни содржини за социјални мрежи
- Осмислување SEO-наслови
- Изработка на квизови и картички со цитати
- Одговори на често поставувани прашања
- Предложување на специфични прашања за интервјуа
Ограничувања во користењето на ВИ
NYT поставил јасни ограничувања за тоа како може да се користи вештачката интелигенција. ВИ не смее да се користи за:
- Комплетна изработка или значителни измени на статии
- Заобиколување на платениот ѕид (paywall)
- Внесување на содржини од трети страни заштитени со авторски права
- Објавување на слики и видеа генерирани со ВИ без јасна ознака
Иако засега е нејасно колку ВИ-содржини ќе бидат дозволени во објавените написи, The New York Times уште во мај 2024 година усвои принципи за користење на вештачка интелигенција. Според тие принципи: “Новинарскиот процес секогаш треба да биде под водство на новинари, кои се одговорни за точноста и квалитетот на содржините”.
Кои ВИ-алатки ги користи NYT?
Покрај Echo, редакцијата на The New York Times користи и други алатки базирани на вештачка интелигенција, меѓу кои:
- GitHub Copilot – помошник за програмирање
- Google Vertex AI – за развој на продукти
- NotebookLM – компаниска апликација за организирање на информации
- ChatExplorer – интерен алат за истражување
- OpenAI API – интерфејс за користење на ВИ (не е поврзан со ChatGPT)
- Неколку алатки на Amazon за анализа и обработка на податоци
Со оваа иницијатива, NYT ја прифаќа технологијата како поддршка на новинарскиот процес, но истовремено ја задржува улогата на човечкиот фактор како клучен елемент во создавањето на новинарските содржини.
