Едит Пералес се пријавила во Националната боливарска милиција, цивилна единица што ја основа покојниот претседател Чавес во 2009 година како помош во одбраната на Венецуела. Шеснаесет години подоцна, 68-годишната Пералес се приклучува на илјадниците други членови на милицијата кои се подготвуваат за потенцијален американски напад, пишува BBC.
Оваа претежно неорганизирана сила, составена главно од постари граѓани, беше активирана откако американската морнарица распореди бродови во јужниот Карипско Море во рамките на, како што рекоа американските официјални лица, операции против трговија со дрога.
Необјавена војна
За време на тие операции, американските сили уништија најмалку три пловила за кои тврдат дека превезувале дрога од Венецуела кон САД, при што загинаа најмалку 17 лица. Венецуелскиот министер за одбрана, Владимир Падрино, изјави дека нападите и присуството на американската морнарица претставуваат „необјавена војна“ против Венецуела. Претседателот Никolas Мадуро веднаш потоа ги повика милиците на активна служба.
Пералес, која живее во четвртта 23 де Енеро, традиционална тврдина на чавизмот во Каракас, вели дека нејзината униформа и чизми се подготвени. Како верен поддржувач на владата, таа истакнува дека е „подготвена да служи секогаш кога ќе ја повикаат“.
„Мораме да ја браниме татковината“, рече таа за BBC, повторувајќи ги зборовите на претседателот Мадуро по нападите.
Влошување на односите со САД
Иако воени експерти сметаат дека американското поморско присуство во Карибите не е доволно големо за да укажува на планирана инвазија, нема сомнение дека веќе напнатите односи помеѓу Венецуела и САД дополнително се влошија откако Доналд Трамп се врати на функцијата.
САД се меѓу земјите што не го признаа реизборот на Мадуро во јули 2024 година, повикувајќи се на докази од опозицијата и независни набљудувачи кои сугерираат дека победил неговиот противкандидат Едмундо Гонзалез. Веднаш по преземањето на функцијата, администрацијата на Трамп ја прогласи венецуелската банда Tren de Aragua за терористичка група, што послужи како оправдување за депортации на мигранти и за неодамнешната воена акција. Администрацијата на Трамп исто така ја зголеми наградата за информации што би довеле до апсење на Мадуро на 50 милиони долари, обвинувајќи го за соработка со наркокартели — обвинување што Мадуро го негира.
Воена обука на улиците
Како одговор на перципираната закана, Мадуро нареди армијата да ги обучи локалните милиции. Тие групи главно се состојат од волонтери од сиромашните заедници, иако некои вработени во јавниот сектор пријавиле дека биле под притисок да се придружат. Во минатото тие најмногу се користеа за пополнување редови на политички собири.
Изминатата сабота, војниците во четвртта Петаре во Каракас започнаа обука на локалното население за ракување со оружје. Сценариото вклучуваше тенкови и празни руски пушки. Повеќето волонтери немаат борбено искуство, но не им недостасува ентузијазам.
„Ако морам да го положам животот во битка, ќе го сторам тоа“, рече 69-годишниот Франциско Охеда додека вежбаше борбена положба со пушка AK-103. Слично чувствува и 67-годишната Глади Родригез: „Немаме да дозволиме ниедна американска влада да дојде и да изврши инвазија.“
Животот тече понатаму
Сепак, надвор од владините упоришта, животот се одвива нормално и малкумина мислат на можноста од инвазија. Дури и во Петаре, недалеку од местото каде се одржуваа вежбите, жителите ги вршеа своите секојдневни работи.
Бенињо Аларкон, политички аналитичар од Католичкиот универзитет Андрес Бељо, смета дека планот на Мадуро не е милицијата да се бори, туку да служи како „жив штит“. Тој тврди дека со повикувањето на цивили владата сака да ја зголеми потенцијалната човечка цена на секоја американска воена акција. Според него, затоа не е важно дали членовите на милицијата се добро обучени или добро вооружени.
Мадуро тврди дека во милицијата и резервите се пријавиле повеќе од 8,2 милиони цивили, но таа бројка се смета за спорна. За Пералес, која е во милицијата со децении, нејзината улога е јасна — таа е бранител на својата улица и четврт. Иако поради годините и здравјето не учествува во новите вежби, вели дека е подготвена. „Мораме да го браниме територијот. Носењето на униформа веќе подразбира одговорност.“
