Паоло Сорентино со својот нов филм La Grazia ја има честа да го отвори 82. Венециски филмски фестивал, кој започна вчера на Лидо во Венеција. Оваа година, фестивалот се одржува до 6 септември и нуди стотици проекции, дебати и бројни гламурозни моменти на црвениот килим и по венецијанските канали.
Филмот на Сорентино, во кој глумат Тони Сервило и Ана Ферцети, е светска премиера и се прикажува во Sala Grande на Palazzo del Cinema. По успехот на The Hand of God во 2021, режисерот повторно се враќа со дело кое, според уметничкиот директор Алберто Барбера, е оригинално и силно поврзано со актуелните теми.
Отворањето го водеше актерката Емануела Фанели, а вечерта заврши со доделување на Златниот лав за животно дело на германскиот режисер Вернер Херцог, кој го претстави својот нов документарец Ghost Elephants.
Во паралелната програма Horizons се прикажа филмот Mother на македонската режисерка Теона Стругар Митевска — портрет на Мајка Тереза, со Нооми Рапас во главната улога.
Гламурот на фестивалот го дополнуваат големи холивудски имиња. Џорџ Клуни, Адам Сендлер, Лора Дерн, Грета Гервиг и Алба Рорвакер се дел од актерската постава на Jay Kelly на Ноа Баумбах. Јоргос Лантимос ја претставува црната комедија Bugonia со Ема Стоун, а Ласло Немеш се натпреварува со историската драма Orphan.
На 29 август ќе пристигне и Џулија Робертс, која за првпат настапува на фестивалот. Таа глуми во психолошката драма After The Hunt на Лука Гваданјино, заедно со Ендрју Гарфилд, Ајо Едебири и Хлое Севињи.
Очекувани се и новите филмови на Гиљермо дел Торо (Frankenstein), Оливие Асајас (The Wizard of the Kremlin со Џуд Ло како Владимир Путин), како и на режисери како Џим Џармуш, Катерин Бигелоу, Франсоа Озон, Гас Ван Сант и многу други.
Во фокус се и доделувањата на награди и признанија, со втор Златен лав за животно дело за Ким Новак и специјални омажи за Елеонора Дузе, Кармело Бене и Нино Д’Анџело.
Фестивалот ветува 10 дена полни со уметност, политички рефлексии и светски гламур, започнувајќи со моќното отворање на Сорентино.
