Краткото велигденско примирје меѓу Русија и Украина, кое требаше да донесе привремено смирување на фронтот, се распадна само неколку часа по неговото стапување во сила, откако Москва и Киев повторно почнаа да се обвинуваат за прекршувања.
Примирјето започна во саботата, на 11 април во 16 часот по московско време, со најавена трајност до крајот на неделата, а украинската страна претходно соопшти дека ќе го почитува договорот.
Сепак, руските власти тврдат дека украински дронови погодиле цели во Курската и Белгородската област, при што биле повредени пет лица. Од друга страна, украинската армија соопшти дека руските сили извршиле 469 прекршувања на примирјето, вклучувајќи гранатирања, напади и употреба на дронови. Овие тврдења засега не се независно потврдени.
И покрај ескалацијата на обвинувања, украинскиот претседател Володимир Зеленски остана на ставот дека прекинот на огнот треба да се продолжи и по Велигден, оценувајќи дека подолг период на мир би бил клучен тест за подготвеноста на Москва за вистински мировен процес.
Примирјето дојде во период на застој во мировните напори, иако непосредно пред неговото започнување двете страни извршија размена на по 175 воени заробеници, со посредство на Обединетите Арапски Емирати – еден од ретките конкретни договори во текот на долготрајниот конфликт.
