Според информациите од Ватикан, папата Франциск имал мирна ноќ откако му била повторно дијагностицирана пневмонија. Сепак, загриженоста за 88-годишниот поглавар на Католичката црква расте.
Како што е соопштено, верниците сега доаѓаат во болницата Гемели во западниот дел на Рим, каде Франциск се лекува од петокот, за да се молат за него. Пред клиниката се собраа бројни сниматели и фотографи, а од петокот нема нови слики од папата. Во меѓувреме и швајцарската гарда се подготвува за смртта на папата, тврди швајцарски весник. Како што дознава Блик, чуварите се под ограничување на движењето, а погребот веќе се вежба.
Ватикан вчера објави дека КТ скен покажал „почеток на билатерална пневмонија“, што значи дека двете крила од бели дробови биле зафатени. Во соопштението се наведува и дека клиничката слика останува „комплексна“. Папата боледува од инфекција предизвикана од различни патогени, што го отежнува лекувањето.
Првично беше кажано дека папата може да се врати во Ватикан оваа недела, но сега нема датум, пишува Блик. Италијанскиот кардинал Анџело Комастри (81) даде изјава за Раи за состојбата на папата. „Франциск е многу мирен. Неговото кормило е во рацете на Господ“.
Две лица блиски до папата изјавија за Политико дека Франциск им рекол дека „можеби овојпат нема да преживее“. Тој беше назначен за папа во 2013 година. За време на неговиот мандат тој, меѓу другото, се залагаше за правата на мигрантите и истрагата за скандалите со злоупотреба.
