Варшава стана првиот град во светот кој е целосно покриен со интегриран систем за воздушна одбрана базиран на американските системи „Патриот“.
Ова следи по постигнувањето на целосна оперативна подготвеност на првата полска дивизија „Патриот“, која е интегрирана со радарски станици и Интегриран систем за борбена команда (IBCS).
Според министерот за одбрана Владислав Косињак-Камиш, новиот систем ѝ овозможува на Полска да пресретнува балистички и крстосувачки ракети, како и да се спротивставува на непријателски авиони.
Американскиот амбасадор истакна дека Варшава е првиот град во светот со целосно оперативен систем „Патриот“ комбиниран со уникатен команден центар на IBCS. Тој додаде дека дури и во САД, систем од ваков обем сè уште не е распореден.
Полска стана првата земја по САД што доби пристап до системот IBCS. Во иднина, тој ќе биде интегриран со ловци F-35, како и со противвоздушниот систем со краток дострел Narev.
Во периодот помеѓу 2027 и 2029 година, Полска ќе добие уште шест батерии „Патриот“. Вкупно, вооружените сили на Полска ќе имаат осум батерии „Патриот“ распоредени во различни делови од земјата.
