Нова анализа открива дека вакцинацијата против херпес зостер, позната и како „шиндра“, може значително да го намали ризикот од сериозни кардиоваскуларни настани како срцев и мозочен удар. Истражувачите анализирале податоци од 19 претходни студии и откриле дека возрасните лица кои примиле вакцина имале 18% помал ризик од вакви здравствени компликации. Кај лица над 50 години, намалувањето на ризикот изнесувало 16%.
Херпес зостер е предизвикан од вирусот варицела-зостер, истиот што ја предизвикува овчата сипаница. Инфекцијата предизвикува болен осип со меурчиња исполнети со течност, кои можат да траат со недели. Претходни истражувања покажале дека оваа болест може да предизвика воспаление и оштетување на крвните садови, што го зголемува ризикот од срцеви и мозочни удари. Ова ги поттикнало научниците да испитаат дали вакцинацијата може да го намали овој ризик.
Во студијата биле опфатени и двата достапни типа на вакцини: рекомбинантната вакцина против херпес зостер (RZV) и живата атенуирана вакцина (ZVL). Намалувањето на ризикот било забележано без оглед на тоа која вакцина била користена.
Сепак, истражувањето има и свои ограничувања. Поголемиот дел од податоците потекнуваат од опсервациски студии, што значи дека не може со сигурност да се тврди дека вакцината директно го предизвикува намалувањето на ризикот. Еден од авторите на студијата, д-р Чарлс Вилијамс од фармацевтската компанија GSK – која и ја финансирала анализата – изјави дека резултатите се „охрабрувачки“, но повика на дополнителни истражувања за да се утврди дали постои директна причинско-последична врска.
Ова е само најновото во низа истражувања кои ги испитуваат дополнителните здравствени придобивки од вакцината против херпес зостер. Претходно оваа година, независни студии исто така покажаа дека оваа вакцина може да го намали и ризикот од деменција.
Наодите од оваа анализа ќе бидат презентирани викендов на Конгресот на Европското здружение за кардиологија во Мадрид.
