Прашањето за безбедноста на Гренланд и поширокиот регион на Северниот Атлантик мора да се решава исклучиво во рамките на НАТО, изјави германскиот министер за надворешни работи Јохан Вадефул, во услови на засилени геополитички тензии и зголемени американски интереси за островот.
Вадефул говореше за време на престојот во Исланд, кој беше меѓустаница на неговото патување кон САД, нагласувајќи дека светот се соочува со нови безбедносни предизвици. „Светот се менува и мораме да даваме соодветни одговори – но одговори во рамките на НАТО“, изјави тој пред медиумите.
Германија, според него, останува подготвена да ги разгледува сите безбедносни прашања заедно со сојузниците. Во Вашингтон, Вадефул треба да се сретне со американскиот државен секретар Марко Рубио, а темата за Северниот Атлантик се очекува да биде дел од разговорите.
Изјавите доаѓаат во момент кога британскиот весник „Телеграф“ објави дека британски воени претставници разговараат со партнери од други европски земји за можноста за заедничка НАТО-мисија во Гренланд, при што и Германија учествува во консултациите.
Британската министерка за транспорт Хајди Александер изјави дека одвраќањето на рускиот претседател Владимир Путин е „рутинска практика“, додека агенцијата Блумберг, повикувајќи се на инсајдерски извори, објави дека Велика Британија и Германија, заедно со други држави, разгледуваат засилување на военото присуство во регионот. Според тие информации, Германија би можела да предложи заедничка НАТО-мисија.
Сепак, извори блиски до германската влада тврдат дека извештаите за голема воена операција или трајно стационирање на НАТО-сили се претерани. Според нив, станува збор пред сè за политички сигнал кон САД дека европските сојузници сериозно ја сфаќаат својата одговорност за безбедноста на Гренланд. Канцеларот Фридрих Мерц, како што се наведува, паралелно води разговори со засегнатите влади.
Темата доби дополнителна тежина по изјавите на американскиот претседател Доналд Трамп, кој ги оправда американските претензии кон Гренланд со потребата од заштита од Русија и Кина. Според него, САД мора да ја стават под своја контрола оваа територија од причини на национална безбедност, иако американско воено присуство таму веќе постои врз основа на договор од 1951 година.
Гренланд, со околу 57.000 жители, е автономна територија на Данска и располага со значајни минерални ресурси. Данска и САД, како членки на НАТО, се обврзани на заемна одбрана, што дополнително ја нагласува чувствителноста на прашањето.
