Советот на ЕУ денеска усвои два нови закони за зајакнување на солидарноста и капацитетите на Европската Унија за откривање, подготовка и одговор на закани и инциденти поврзани со кибер безбедноста.
Како што јави дописникот на МИА од Брисел, станува збор за регулативи кои се дел од пакетот закони наречен „Акт за кибер солидарност“, чија цел е измена на постојната Директива за кибер безбедност.
Целта на овие измени е зајакнување на капацитетите на ЕУ, со цел таа да биде поотпорна на кибер заканите, но во исто време и засилување на нејзините механизми за соработка.
Со денеска усвоените закони, меѓу останатото, се воспоставува „систем за предупредување за кибер безбедноста“, кој е замислен како паневропска инфраструктура составена од национални и прекугранични кибер центри низ целата ЕУ, задолжени за споделување информации, како и за откривање и спречување на кибер заканите.
Овие кибер центри ќе користат најсовремена технологија, како што е вештачката интелигенција (ВИ) и напредна аналитика на податоци за откривање и споделување навремени предупредувања за кибер закани и прекугранични инциденти, а воедно ќе ја зајакнат и постоечката европска рамка за поефикасна реакција на инциденти поврзани со безбедноста на интернет.
Новите регулативи, исто така, предвидуваат создавање Механизам за вонредни случаи на кибер безбедност, со цел да се зголеми подготвеноста и да се подобрат капацитетите за одговор на инциденти во ЕУ, пред се поврзани со кибер закани по критичните сектори, како здравството, транспортот и енергијата, воведување на услуги за реакции на онлајн инциденти во приватниот сектор во Унијата и во трети земји партнери, како и обезбедување на техничка меѓусебна помош.
Се оценува дека новите мерки ќе ја зајакнат кибер отпорноста на ЕУ преку превенција, откривање, одговор и закрепнувањето од инциденти поврзани со онлајн безбедноста.
