Американскиот носач на авиони USS Gerald R. Ford го напушти сидриштето пред Градското пристаниште во Сплит, каде што престојуваше од 28 март поради планирана посета и техничко одржување, потврди Пристанишната управа на Сплит.
Носачот на авиони USS Gerald R. Ford вплови во Сплит во саботата во рамки на планирана посета и техничко одржување, соопшти американската амбасада во Хрватска, додавајќи дека посетата има цел да ги зајакне американско-хрватските односи и да го потврди сојузништвото во НАТО. За време на престојот не беше организирана посета на бродот за медиумите.
Станува збор за најголемиот воен брод некогаш изграден, со екипаж од околу 4.500 членови и најсовремена морнаричка опрема, кој во последните месеци бил активен во различни меѓународни мисии пред да пристигне во Сплит.
Бродот и претходно ја посетил сплитската лука, во октомври 2025 година, а првпат пристигнал во Сплит во јуни 2023 година.
