Стотици граѓани, на иницијатива на Граѓанската иницијатива „Стоп за Усје“, во 18:00 часот ја блокираа раскрсницата меѓу булеварите „Борис Трајковски“ и „Србија“. Паролата „Усје фабрика за смрт“ ја изрази бесот и револтот на жителите кои не можат да го дишат сопствениот град.
Протестот беше мирен, но решителен. Граѓаните бараат итна дислокација на цементарницата „Усје“ за да се заштити јавното здравје, особено во услови кога загадувањето во Скопје е алармантно. Иницијативата ја поздрави одлуката на градот да го откаже огнометот за централната новогодишна прослава поради загадениот воздух и апелира институциите сериозно да се позанимаваат со проблемот.
Активистите истакнаа дека во последните месеци внимателно го истражувале работењето на фабриката и наишле на сериозни проблеми кои, според нив, се повторуваат и кај други фабрики на „Титан“ во светот. „Она до што стигнавме како заклучок е дека Титан е интернационална компанија која не првпат има вакви проблеми. Слични случаи се забележани и во Америка и во Египет. Се работи за мафија која наоѓа легални начини да го оправда тоа што го прави. Станува збор за странски капитал и директори кои ги трујат нашите деца“, вели Петар од „Стоп за Усје“.
Скопје не е само најголемиот град во Македонија – тој е и еден од најзагадените во Европа и светот. ПМ2.5 честичките редовно надминуваат границите препорачани од СЗО, а во некои денови градот се рангира во топ‑10 најзагадени градови глобално. Последиците од загадувањето не се само бројки: тоа е здравствен ризик што го загрозува секојдневниот живот, особено кај деца, постари лица и хронично болни.
Граѓаните вчера покажаа дека се будни и внимателно ја следат ситуацијата, дури и во празниците. „Проблемот со ‘Усје’ мора да се реши веднаш, без понатамошни компромиси“, велат од иницијативата. Оваа блокада е сигнал дека тие нема да се откажат додека воздухот кој го дишат нивните семејства и деца не биде безбеден.
Воздухот во Скопје не чека. И додека институциите премногу често реагираат со тивка инертност, граѓаните испратија порака: доволно е. Доволно е од загадување, од оправдувања, од профит над здравјето.
