Тинек Стрик, холандска пратеничка од Зелените и лидерка на парламентарната група што ја истражуваше состојбата со демократијата во земјата, изјави дека настаните во Унгарија „брзо се движат во погрешна насока“.
„Искрено сакаме оваа земја повторно да стане вистинска демократија, бидејќи веруваме дека граѓаните на Унгарија заслужуваат исти права и вредности какви што уживаат сите граѓани на ЕУ“, рече таа по завршувањето на тридневната посета.
Петтемина европратеници пристигнаа токму на денот кога унгарскиот парламент гласаше за уставен амандман со кој ѝ се овозможува на владата да забрани ЛГБТИ+ собири. Законот, донесен уште во март, веќе ја забрани Прајд парадата, дозволи употреба на технологија за препознавање лица за идентификација на учесниците и воведе глоби – мерки што организации за човекови права ги опишуваат како „целосен напад“ врз ЛГБТИ+ заедницата.
Стрик предупреди дека организаторите и учесниците на Прајдот во Будимпешта, кој се одржува веќе 29 години, сега ризикуваат кривичен прогон за мирно изразување на различноста, еднаквоста и слободата.
Европратениците го повикаа Европскиот суд на правдата – по иницијатива на Европската комисија – да го суспендира унгарскиот закон додека трае понатамошната правна постапка.
Кржиштоф Шмишек од полската Нова левица рече дека законот создал „многу непријателска атмосфера“ за ЛГБТИ+ лицата во Унгарија, што веќе довело до пораст на физичко насилство и злосторства од омраза.
Полскиот европратеник Михај Ваврјкевич, познат по неговата борба за независно судство, рече дека неговата група забележала „недвосмислено влошување на состојбата“ и „отворено негирање на владеењето на правото“. Дел од унгарските функционери, додаде тој, покажале „многу агресивен пристап и грубо однесување“ кон европратениците.
Софи Вилмес, поранешна премиерка на Белгија и либерална европратеничка, изрази загриженост за состојбата со медиумите во земјата, посочувајќи дека државната контрола врз медиумскиот простор довела до тоа „клеветнички кампањи да станат новата норма“.
