Изјавата ја поддржаа 26 земји-членки на ЕУ (Австрија, Белгија, Бугарија, Хрватска, Кипар, Чешка, Данска, Естонија, Финска, Франција, Германија, Грција, Ирска, Италија, Летонија, Литванија, Луксембург, Малта, Холандија, Полска, Португалија, Романија, Словачка, Словенија, Шпанија и Шведска). Велика Британија исто така се придружува на оваа изјава, информира Европската служба за надворешни работи.
„На 27 август, Русија изврши уште еден голем напад врз Киев и многу други украински градови, при што загинаа најмалку 23 цивили, вклучувајќи четири деца, а многу други беа повредени. Изразуваме сочувство, стоиме во солидарност со сите Украинци и силно ги осудуваме тековните напади на Русија врз цивили и цивилна инфраструктура, кои претставуваат намерна ескалација и ги поткопуваат напорите за мир“. се вели во изјавата.
Нападот, исто така, предизвика сериозна штета на зградите на Делегацијата на Европската унија во Киев, „уште еднаш покажувајќи ја непромислената природа на нападите на Русија и нејзиното непочитување на меѓународното право“, стои во текстот. Загрозувањето на животите на дипломатите и дипломатскиот персонал е јасно кршење на Виенската конвенција за дипломатски односи. Зградата на Британскиот совет во Киев исто така беше значително оштетена, а еден чувар беше повреден, потсетува Службата на ЕУ.
„Намерните напади врз цивили и невоени цели се воени злосторства. Сите команданти, сторители и соучесници на овие сериозни прекршувања на меѓународното хуманитарно право ќе бидат повикани на одговорност. Овие злосторства само ја зајакнуваат нашата решителност и цврстина да ја поддржиме Украина и нејзиниот народ во нивната одбрана од Русија и во нивното барање за сеопфатен, праведен и траен мир. ЕУ ќе продолжи и ќе ја зголеми својата сеопфатна поддршка за Украина на сите нивоа, вклучително и со забрзување на работата на 19-от пакет санкции“, се наведува во изјавата.
Од март 2025 година, Украина е посветена на целосен и безусловен прекин на огнот и постојано изразува подготвеност за мир, додека Русија ги ескалира нападите врз цивили и цивилна инфраструктура, се вели во текстот.
„Ќе продолжиме да работиме со меѓународните партнери, вклучувајќи ги и САД, за да ја завршиме агресивната војна на Русија со сеопфатен, праведен и траен мир. Русија мора да го запре убивањето и да покаже вистинска подготвеност за мир“, нагласува Европската служба за надворешни работи.
