Стотици мигранти се стравува дека се исчезнати или загинале во серија смртоносни бродоломи во централниот Медитеран од почетокот на 2026 година, соопшти во понеделникот Меѓународната организација за миграции (ИОМ), агенција на Обединетите нации.
ИОМ изрази „длабока загриженост“ поради извештаите за повеќе бродоломи во изминатите десет дена, кои сè уште се предмет на проверка. Според прелиминарните информации, неколку чамци исчезнале на море, а бројот на можни жртви се проценува на стотици.
Портпаролот на ИОМ, Хорхе Галиндо, за агенцијата АФП изјави дека на 23 и 25 јануари биле пријавени најмалку три бродоломи, при што се стравува дека животот го загубиле најмалку 104 лица. Потешките временски услови, предизвикани од циклонот „Хари“, значително ги отежнале операциите за пребарување и спасување.
Според податоците на ИОМ, чамците најверојатно испловиле од Тунис и Либија. Во меѓувреме, во близина на Лампедуза, Италија, биле потврдени три смртни случаи по спасувачка акција на брод кој тргнал од градот Сфакс во Тунис.
„Меѓу жртвите има и едногодишни близначки, кои починале од хипотермија непосредно пред искрцувањето, како и еден возрасен маж“, соопшти ИОМ. Преживеаните од истата операција изјавиле дека друг чамец што тргнал во исто време од истата локација никогаш не пристигнал.
Агенцијата дополнително истражува информации за девет исчезнати чамци, кои испловиле од Тунис меѓу 14 и 21 јануари, со околу 380 лица на бродовите.
„Само во првите недели од 2026 година, стотици луѓе веќе се водат како исчезнати, а конечниот број на жртви може да биде значително поголем“, предупреди ИОМ, оценувајќи ја ситуацијата како „уште една голема трагедија“ во централниот Медитеран.
Организацијата остро ги осуди мрежите за шверц и трговија со луѓе, нагласувајќи дека тие свесно испраќаат мигранти на море со небезбедни и пренатрупани пловила, дури и во услови на силни невремиња.
Централниот Медитеран и понатаму останува најсмртоносната миграциска рута во светот. Само минатата година таму загинале најмалку 1.340 мигранти, а од 2014 до крајот на 2025 година, повеќе од 33.000 лица загинале или исчезнале во обид да ја преминат оваа морска рута, покажуваат податоците на проектот Missing Migrants на ИОМ.
Извор- Меѓународна организација за миграции (IOM / UN), АФП
