На 21 октомври 2025 година се одржа третата седница на новиот состав на Универзитетското студентско собрание (УСС) на Универзитетот „Св. Кирил и Методиј“ во Скопје, на која беа избрани деветте студентски претставници во Универзитетскиот сенат.
Новоизбраните сенатори, чиј мандат започнува на 1 ноември, се:
- Адам Стојановски – Природно-математички факултет
- Филип Питулков – Економски факултет
- Борјан Велјановски – Економски факултет
- Сергеј Пуриќ – Правен факултет „Јустинијан Први“
- Александар Димоски – Факултет за информатички науки и компјутерско инженерство (ФИНКИ)
- Анастасија Митревска – Факултет за шумарски науки, пејзажна архитектура и екоинженеринг „Ханс Ем“
- Ружица Јанкуловска – Градежен факултет
- Александар Бојчовски – Правен факултет „Јустинијан Први“
- Александар Власов – Стоматолошки факултет
Минатата недела беше избрана и Ангела Василевска, која ќе застане на чело на Универзитетското студентско собрание, чиј мандат исто така започнува на 1 ноември.
Универзитетското студентско собрание претставува највисоко претставничко тело на студентите на УКИМ, со клучна улога во заштитата на студентските права, унапредувањето на студентскиот стандард и активно учество во одлучувањето за академските и институционалните политики.
Претставниците на студентите – членови во органите и телата на Универзитетот – имаат право и должност да ги застапуваат интересите на своите колеги, редовно да присуствуваат на седниците и активно да придонесуваат во развојот на универзитетската заедница.
Со новиот состав на УСС и Сенатот, започнува уште една академска година во која студентскиот глас ќе продолжи да биде суштински дел од одлучувачките процеси на најголемиот универзитет во државата.
