Украина во текот на ноќта извршила напади врз термоелектрана во руската Белгородска област и врз складиште на нафта во окупираниот Луганск, според тврдењата на руски официјални лица и снимки објавени на социјалните мрежи. Поради нападот, делови од Белгород останале без електрична енергија.
Според локални канали на Телеграм, градот Белгород, кој се наоѓа на околу 34 километри од украинската граница, бил погоден со повеќецевни ракетни системи HIMARS. Гувернерот на Белгородската област, изјави дека „масовен ракетен напад“ ја таргетирал енергетската инфраструктура во градот и околината.
„Нанесена е сериозна штета на енергетските објекти. Поради тоа дојде до прекини во снабдувањето со струја, нарушувања во водоснабдувањето и проблеми со греењето“, изјави Гладков. Во моментот на објавување на информациите, тврдењата не беа независно потврдени.
Истата ноќ беа објавени фотографии и видеа од складиште на нафта во Луганск кое гори. Градот е под руска окупација од 2014 година. Според локални жители, на пожарот му претходеле повеќе експлозии. Руското Министерство за одбрана соопшти дека во текот на ноќта биле соборени 95 украински беспилотни летала над различни региони во земјата.
Украина редовно напаѓа воена и енергетска инфраструктура длабоко на руска територија и во окупираните области, со цел да го ослабне воениот потенцијал на Москва. Киев ги смета нафтените постројки за легитимни воени цели, тврдејќи дека тие директно го финансираат руското воено дејствување.
Нападите доаѓаат во период кога Русија спроведува сопствена кампања на удари врз украинската енергетска мрежа, оставајќи илјадници граѓани без струја и греење во текот на есента и зимата. Белгород во последните недели беше цел на повеќе напади, при што властите неколкупати пријавија оштетувања на клучна инфраструктура.
