Комерцијалниот увоз на електрична енергија во Украина од Словачка и Унгарија продолжува без прекин, и покрај претходните најави за можни ограничувања од страна на владите во Братислава и Будимпешта. Според податоците од енергетскиот билтен на украинската консултантска куќа EXPRO, нивото на увоз останало стабилно во текот на февруари.
Претходно, словачкиот премиер Роберт Фицо најави дека од 23 февруари ќе бидат прекинати итните испораки на електрична енергија за Украина. И Унгарија сигнализираше можност за запирање на извозот на струја и природен гас, условувајќи го продолжувањето со обновување на транспортот на руска нафта преку нафтоводот „Дружба“. Сепак, бројките покажуваат дека трговијата со електрична енергија засега се одвива непречено.
Од почетокот на февруари, Украина увезла околу 1,1 милион мегават-часови електрична енергија. Најголем дел, околу 49 проценти, пристигнал од Унгарија, додека 18 проценти биле обезбедени од Словачка. Останатиот дел доаѓа од други европски земји поврзани со украинската електроенергетска мрежа.
Паралелно со ова, тензиите околу нафтоводот Дружба продолжуваат. Испораките на руска нафта кон Унгарија и Словачка беа прекинати на 27 јануари, кога, според Киев, руски напад оштетил опрема на територијата на западна Украина. Од друга страна, Братислава и Будимпешта ја обвинуваат Украина за доцнењето во обновата и тврдат дека прекинот трае веќе речиси еден месец.
За време на посетата на Киев по повод четвртата годишнина од руската инвазија, претседателката на Европската комисија Урсула фон дер Лајен изјави дека Европската унија бара од Украина да ги забрза поправките. Украинскиот претседател Володимир Зеленски возврати дека санацијата на „Дружба“ не може да се заврши брзо, и покрај притисоците од Брисел и негодувањето од Унгарија.
И покрај политичките закани и меѓудржавните обвинувања, тековните податоци покажуваат дека енергетската соработка во делот на електричната енергија засега останува стабилна, додека спорот околу нафтоводот продолжува да биде точка на дипломатски притисок во регионот.
