Украина ги отфрли како „апсурдни“ руските тврдења дека Киев се обидува да набави нуклеарно оружје со помош на Велика Британија и Франција.
„Руските функционери, познати по импресивната низа лаги, повторно се обидуваат да конструираат стара глупост за ‘валкана бомба’“, изјави за Reuters портпаролот на украинското Министерство за надворешни работи, Георгиј Тихи.
„Да бидеме јасни – Украина повеќепати ги демантираше овие апсурдни руски тврдења, а сега тоа повторно го правиме и официјално. Ја повикуваме меѓународната заедница да ги отфрли и осуди руските валкани информативни бомби“, додаде Тихи.
Обвинувања без докази
Претходно, руската Служба за надворешно разузнавање на Русија (SVR), без да приложи докази, ги обвини Лондон и Париз дека се подготвуваат тајно да ја снабдат Украина со делови и технологија за нуклеарно оружје.
И Велика Британија и Франција, кои се нуклеарни сили, засега не одговориле официјално на обвинувањата.
Тензиите околу нуклеарната реторика повторно ја зголемуваат загриженоста во меѓународната јавност, особено во контекст на тековниот конфликт и засилената информациска војна меѓу Москва и Киев.
