Украдениот златен шлем од Котофенешти, еден од највредните археолошки предмети на Романија, е пронајден по повеќе од една година од кражбата во Холандија. Овој артефакт, стар околу 2.500 години, беше украден во јануари 2025 година од музејот Дрентс во градот Асен, кога крадци со експлозив насилно влегле во објектот и однеле неколку вредни предмети.
Покрај шлемот, тогаш биле украдени и златни нараквици кои биле дел од изложба посветена на древната дачка цивилизација. Овие предмети биле позајмени од национален музеј во Букурешт, што ја зголеми чувствителноста на случајот и предизвика реакции од романските власти.
Според информации од истрагата, полицијата успеала да го пронајде шлемот, кој има мали оштетувања, како и дел од украдените предмети. Надлежните најавија дека ќе дадат дополнителни детали по официјална прес конференција.
Овој случај предизвика голема загриженост во јавноста, бидејќи станува збор за културно наследство од огромно значење за Романија. Кражбата доведе и до политички и дипломатски тензии, а холандските власти дури обезбедија милионска отштета за штетата.
Пронаоѓањето на шлемот се смета за голем успех на истражните органи и важен чекор во заштитата на културното наследство.
