По околу еден месец ограничувања, граѓаните на Струга повторно можат да ја користат водата од изворот Шум. Од Центарот за јавно здравје информираа дека најновите лабораториски анализи покажале дека матноста на водата е намалена и повторно е во рамките на дозволените вредности.
И покрај укинувањето на забраната, надлежните институции најавуваат дека состојбата ќе продолжи внимателно да се следи. Во наредниот период ќе се врши редовно земање примероци од водата со цел да се контролира нејзиниот квалитет и безбедноста на водоснабдувањето.
Во текот на инспекцискиот надзор било утврдено дека во близина на изворот се изведувале активности поврзани со ископ на минерали. Дополнително, било констатирано и дека Јавното претпријатие „Водовод и канализација“ користело вода од изворот без соодветна дозвола.
Градоначалникот на Струга изјави дека општината засега нема потреба од финансиска помош, туку фокусот е ставен на утврдување на причините што довеле до зголемената матност на водата. Воедно, општината испратила и предлози до Владата за решавање на правните прашања, меѓу кои и прогласување заштитена зона околу извориштето.
За случајот е отворен и предмет во Обвинителството, кое треба да утврди дали имало пропусти или незаконски активности што довеле до загадувањето на водата.
