Управата за хидрометеоролошки работи предупредува ека водостоите на реките ширум земјата алармантно растат, а најкритична е состојбата на Вардар.
Бранот вода од горниот тек денес се движи кон Скопје и селата низводно, со ризик за локални излевања, особено на потегот од Јурумлери до Зелениково.
– Локалните излевања и мали заезерувања веќе се можни. Граѓаните треба да бидат внимателни при движење покрај овие делови од Вардар – велат од УХМР.
До вечерните часови се очекува бранот да продолжи кон Велес. Високи водостојни нивоа има и на Лепенец и Пчиња, а истото важи и за Кумановска Река, каде водостојот е значително покачен.
Алармантно е и со реката Драгор, која е веќе до врвот на коритото, додаваат од УХМР.
Покрај растот на реките, обилните врнежи носат и дополнителни закани.
– Очекуваме појава на одрони и свлечишта, особено во западните делови. Секое непотребно движење по критичните патни правци треба да се избегнува, велат оттаму.
