Министерката за наука, високо образование и млади во Влада на Кантонот Сараево, Адна Месиховиќ, и нејзината помошничка, Џенита Витешкиќ од партијата “За нови генерации”, се уапсени денеска поради сомневање дека незаконски вработиле повеќе лица.
Едно од незаконски вработените е и нивната партиска колешка Аријана Турковиќ.
Портпаролката на Јавното обвинителство на Кантонот Сараево, Азра Бавчиќ, изјавила за новинарите дека Месиховиќ и Витешкиќ се осомничени за кривично дело злоупотреба на положбата или овластувањето.
Бавчиќ додала дека биле претресени становите на осомничените и канцелариите на Министерството, како и дека е земена документација и друго што може да послужи во кривичната постапка.
