Турската полиција приведе карикатурист од сатиричниот магазин Leman поради објава на карикатура што го прикажува пророкот Мухамед – што предизвика бурни реакции и протест пред просториите на редакцијата во Истанбул.
Министерот за внатрешни работи Али Јерликаја на социјалната мрежа X објави дека лицето, идентификувано само со иницијалите Д.П., е приведено за испрашување. Во прилог беше споделено и видео од моментот на апсењето, на кое се гледа уметникот со лисици зад грб.
Покрај тоа, министерот за правда Јилмаз Тунч соопшти дека е отворена истрага против магазинот поради можни обвиненија за „јавна навреда на верски вредности“. Тој порача дека ваквите дела го нарушуваат верското чувство и општествениот мир.
„Ниту една слобода не дозволува светите верски вредности да станат предмет на навредлив хумор,“ напиша Тунч на X.
Сличност со случајот „Шарли Ебдо“
Протестите пред редакцијата на Leman ги организираше група млади лица, за кои се верува дека припаѓаат на исламска организација. Тие фрлаа камења кон зградата на магазинот, откако беше објавена карикатура во која се прикажуваат пророкот Мухамед и пророкот Мојсе како си разменуваат поздрав во воздух, додека над нив паѓаат проектили.
Инцидентот потсети на трагичниот напад врз францускиот сатиричен неделник Charlie Hebdo во 2015 година, кога двајца вооружени напаѓачи убија 12 лица, вклучително и водечки карикатуристи, поради објавени карикатури на пророкот Мухамед.
Случајот во Турција повторно ги отвора прашањата за границата меѓу слободата на изразување и почитувањето на верските чувства – особено во контекст на се почестите тензии меѓу медиумите и религиозните групи.
