Осумнаесетгодишник од тетовското село Палатица е приведен под сомнение дека стои зад серијата лажни дојави за поставени бомби во основни и средни училишта во Тетово, информира полицијата.
Како што соопшти СВР Тетово, на 27 февруари 2026 година во 09:10 часот полициски службеници од Одделот за сузбивање на организиран и сериозен криминал при МВР, во координација со СВР Тетово, го лишиле од слобода М.Р. (18). Тој се сомничи дека во повеќе наврати испраќал електронски пораки до образовни институции со тврдења дека во објектите се поставени експлозивни направи.
По извршените проверки било утврдено дека сите дојави биле лажни, но поради безбедносните протоколи наставата во училиштата била прекинувана, а кај граѓаните се создала вознемиреност.
Со судска наредба бил извршен претрес во домот на осомничениот во селото Палатица, при што биле одземени повеќе електронски уреди. Лицето е приведено во полициска станица, а по целосно документирање на случајот, во координација со јавен обвинител, против него ќе биде поднесена соодветна кривична пријава.
