Во Европската Унија минатата година е забележан рекорден интерес за приватно сместување. Вкупно 951,6 милиони ноќевања биле реализирани преку онлајн платформите како Airbnb, Booking или Expedia, објави денеска Евростат. Канцеларијата за статистика на ЕУ наведува дека ова претставува зголемување од 11,4 отсто во споредба со 2024 година, но и фрапантен скок од дури 32,4 отсто во однос на 2023 година.
Јадранот е апсолутен владетел на сезоната
Јадранското приморје во Хрватска се најде на самиот врв на најпосакуваните дестинации. Според податоците за третиот квартал од 2025 година, туристите најмногу ги избирале следните региони:Јадранско приморје, Хрватска – 27,7 милиони ноќевања, Андалузија, Шпанија – 19,5 милиони ноќевања и Прованса-Алпи-Азурен брег, Франција – 16,9 милиони ноќевања
Интересно е што Јадранот убедливо води пред светски познатите дестинации во Шпанија и Франција, потврдувајќи го статусот на туристички лидер во овој дел од Европа.
Каде најмногу се патува во ЕУ?
Меѓу 20-те најпопуларни туристички региони се најдоа дестинации од само шест земји-членки на ЕУ. Доминацијата е распределена на следниов начин: Франција: 6 региони, Шпанија: 5 региони, Италија: 4 региони, Грција: 3 региони, Португалија: 1 регион и Хрватска: 1 регион (но најпосетен).
Раст и во зимските месеци
Позитивниот тренд продолжи и во последниот квартал од годината (октомври – декември). Во овој период се остварени 172,3 милиони ноќевања, што е за околу 11 отсто повеќе од претходната година. Ова покажува дека туристичката сезона во Европа се продолжува и надвор од летните месеци, благодарение на лесната достапност на сместувањето преку дигиталните платформи.
