Среде топлото августовско лето, бегајќи од скопскиот жежок асфалт екипата на Трн се упати на некои 180 километри во источен правец кон Пехчево. На само неколку километри од градот, во непосредна близина на локалитетот Св. Петка го сретнавме младиот пчелар Димитар Митровски. Со задоволство не прими во неговиот пчеларник. Вели дека годинава, особено на почетокот тргнала доста лошо, но сепак со промената на временските услови се постигнал добар успех во пчеларството.
„Со пчеларството почнав да се занимавам од мои 16 – 17 години, но желба имав од мали нозе. Почнавме со татко ми со само неколку пчелни семејства“, вели Митровски додека ги прави проверките во секој еден од сандаците.
Неговата медна приказна ја развива една деценија, па денес во пространата ливада можат да се забележат 20-тин пчелни семејства. Изобилството на богата вегетација, бројни дрвца од багрем, даб и бор е главен „виновник“ за вкусниот мед на Митровски. Сепак потенцира дека за да се дојде до ливадскиот или шумскиот мед процесот не е ни најмалку едноставен.
„Пчеларникот ми се наоѓа на околу 1100 метри надморска височина недалеку од градот Пехчево, во близина на манастирот Св. Петка. За таа локација се одлучивме, бидејќи имаме голема ливада во која има и вода и редовно се коси, наоколу има дрвја од багрем, даб и бор и едноставно местоположбата е добра за пчеларство. Под грижа за пчелните семејства се подразбира обезбедување на храна во есенскиот и пролетниот периот кога храната за пчелите е намалена. За послабите пчелни семејства, во зимниот периот, потребно е и третирање со лекарства како тие би биле јаки и издржливи“, ни раскажува Митровски додека го дегустираме медот кој го произвел во оваа сезона.
Тој е еден од ретките млади луѓе кој одлучил мирот и спокојството, барем на миг, да го најде во спој со природата. Среќен е што се повеќе млади се интересираат за неговото хоби, па често знаат и да го прашаат за процесот на чување и грижа за пчелите.
„Реакциите на луѓето во голем дел се доста позитивни, а тоа ме охрабрува дополнително да се вложам во тоа што е мое хоби, моја пасија. Искрено размислувам и за проширување на бројот на пчелни семејства, бидејќи услови има, локацијата е погодена, а и медот е сладок и вкусен“, со насмевка вели Митровски.
Пред да се поздравиме и да продолжиме да ги истражуваме убавините на пехчевскиот крај кусо ни рече:
„Ги охрабрувам сите оние кои сакаат да се занимаваат со пчеларство да почнат што поскоро, бидејќи многу е забавно и пчелите претставуваат цела наука“.
Опиени од мирисот на разни билки, засладени со еколошки ливадски мед се упативме кон Пехчево и неговата раскошна природа. Се чини дека уште долго ќе го паметиме и амбиентот на пчеларникот и вкусот на медот, кој верувајте нема да го најдете во ниту најснабдениот маркет.
