Според првичните резултати од истрагата, трагедијата најверојатно е предизвикана од истекување на гас.
Надлежните органи веднаш отворија истрага за да ја утврдат точната причина за експлозијата, откако станарите претходно пријавиле силен мирис на гас во зградата. Енергетската компанија што го снабдува објектот потврди дека дотокот на гас бил прекинат, но дека бил забележан оштетен вентил на еден од приклучоците, што најверојатно довело до експлозијата.
Меѓу жртвите е и жена за која се претпоставува дека била бремена, пронајдена под урнатините на шестиот кат. Два ката од осумкатната зграда се целосно оштетени, а властите предупредуваат дека конструкцијата е нестабилна и може да се урне. Заради безбедност, сите станари се евакуирани, како и учениците и наставниците од блиското средно училиште.
„Постои сериозен ризик зградата да се сруши, затоа целосно ја евакуиравме“, изјави Раед Арафат, шефот на Одделот за вонредни ситуации, кој пристигна на местото на несреќата.
Премиерот на Романија, Илие Боложан, потврди дека зградата најверојатно ќе мора да биде урната, а целиот кварт околу неа е затворен за јавноста.
Две од повредените лица се во тешка состојба, додека спасувачките тимови и натаму пребаруваат под урнатините во потрага по можни нови жртви.
Од Школската инспекција во Букурешт информираа дека неколку ученици од блиското училиште се здобиле со полесни повреди, кои биле веднаш згрижени од медицинските екипи.
Несреќата ја потресе романската престолнина и повторно го отвори прашањето за безбедноста на старите станбени згради и застарената инфраструктура за снабдување со гас, која сè почесто се посочува како потенцијален ризик за жителите.
Извор: AP News
