Федералната влада на САД ќе признава само два пола, машки и женски, според извршната уредба што претседателот Доналд Трамп ја потпиша на првиот ден од неговиот нов мандат.
Наредбата ги поништува напорите на администрацијата на Бајден да ги прошири „ознаките на родовиот идентитет“, додавајќи ги и во пасошите, пишува CNN.
„Од денес официјалната политика на владата на Соединетите Амерички Држави е дека постојат само два пола, машки и женски“, рече Доналд Трамп за време на неговиот инаугурациски говор во понеделникот, што беше едно од неговите ветувања.
Под насловот „Одбрана на жените од екстремизмот на родовата идеологија и враќање на биолошката вистина во федералната влада“, наредбата вели дека „половите не може да се менуваат и дека се засновани на основната и непобитна реалност“.
Федералната влада исто така ќе премине од користење на терминот „род“ (gender) на „пол“ (sex), а полот е „непроменлива биолошка класификација на поединецот“, рече официјален претставник на Трамповата администрација за новинарите во понеделник.
Сите владини агенции ќе обезбедат дека официјалните документи, вклучувајќи пасоши, визи и Global Entry картици, „точно го одразуваат полот на својот носител“, се вели во извршната наредба.
Исто така, одделенијата што ги водат федералните затвори, азилите за мигранти, сигурните домови за жртви на силување и други „интимни простори“ ќе мора да ја заштитат приватноста на оној пол кој е сместен таму.
Евиденцијата за вработените исто така ќе се придржува до извршната наредба, како и пораките од федералните министерства.
„Агенциите повеќе нема да промовираат родова идеологија“, рече официјален претставник, додавајќи дека грантовите и договорите ќе бидат ревидирани за да се осигура дека „федералните фондови нема да се користат за промоција на родова идеологија“.
Оваа одлука го поништува напорот на администрацијата на Бајден, особено можноста која од 2022 година им беше дадена на Американците да изберат „x“ како свој пол во пасошите. Тоа „x“ не мораше да одговара на полот што беше наведен во други документи или на фотографијата, ниту беше потребно да се менува полот во медицинската документација, објави Стејт департментот.
