Светската трговија во пад поради царините на Трамп – СТО предупредува на глобални ризици
Светската трговска организација (СТО) прогнозира значителен пад на глобалната трговија во 2025 година, како директна последица од царините воведени од американскиот претседател Доналд Трамп, јавува Би-Би-Си.
Во анализата на СТО се посочува дека постојат сериозни негативни ризици за меѓународната трговија, меѓу кои се реципрочните царини, како и зголемената политичка неизвесност.
Најпогодена ќе биде Северна Америка, каде што се очекува трговијата да опадне за повеќе од 10 проценти.
Претходните предвидувања на СТО беа оптимистички – раст од 2,7 проценти – но новата прогноза укажува на пад од 0,2 процента на глобално ниво.
Генералната директорка на СТО, Нгози Окоњо Ивеала, изјави дека трговското „раздвојување“ меѓу САД и Кина е загрижувачки феномен кој може да има долгорочни последици.
Главниот економист на СТО, Ралф Оса, предупреди:
„Нашите симулации покажуваат дека неизвесноста околу трговските политики има значајно негативно влијание врз извозот и економската активност.“
Дополнително, Конференцијата на ОН за трговија и развој (УНКТАД) денеска објави слична проценка, предвидувајќи дека глобалниот економски раст ќе се успори на 2,3 проценти. Тоа е под границата од 2,5 проценти, која се смета за сигнал на можна глобална рецесија.
Од 5 април во САД стапи во сила основна царина од 10 проценти на речиси целиот увоз, додека за производите од Кина таа достигнува вртоглави 145 проценти.
Американскиот берзански пазар реагираше негативно – сите главни индекси забележаа пад на денешното отворање поради зголемената неизвесност.
И покрај сето тоа, СТО предвидува дека Азискиот и Европскиот регион ќе забележат умерен раст на трговијата.
За првпат во извештајот се дава прогноза и за трговијата со услуги – како туризам и финансии – каде наместо физички производи се разменуваат услуги. Според проценките, трговијата со услуги ќе порасне за 4 проценти во 2025 година, што е еден процент помалку од првичните очекувања.
