Администрацијата на американскиот претседател Доналд Трамп разгледува можност за специјална операција насочена кон иранските резерви на високо збогатен ураниум, во потег што би значел ново и многу чувствително проширување на конфликтот со Техеран. Според „Волстрит џурнал“, се работи за воена операција за извлекување на околу 450 килограми ураниум од Иран.
Според американските медиуми, една од опциите што се наоѓаат на маса е директна акција за преземање или обезбедување на иранскиот нуклеарен материјал.
Прашањето е особено важно затоа што Трамп повеќепати повторува дека една од главните цели на американскиот притисок врз Иран е земјата никогаш да не дојде до нуклеарно оружје. Но токму евентуалното преземање на ураниумот се смета за една од најризичните можни операции, бидејќи би можело да бара присуство на американски сили на иранска територија и да отвори нова фаза на директна воена ескалација.
„Њујорк тајмс“ објави дека американските трупи распоредени во регионот би можеле да бидат искористени за мисија за запленување на високо збогатен ураниум во нуклеарниот објект Исфахан. Сепак, истите трупи би можеле да бидат искористени и за заземање на островот Харг или за заштита на Хормускиот Проток.
Станува збор за сложен и опасен потег, за кој многу експерти оценуваат дека тешко би се извел без поголемо ангажирање на копнени сили. Според CNN, во можните сценарија за ваква акција се спомнува ангажирање на некои од најелитните американски специјални единици, меѓу кои и Делта Форс и SEAL Team 6, кои се обучени за операции поврзани со закани од оружје за масовно уништување.
Американските и израелските сили со години развиваат капацитети за ваков тип мисии, а Израел и претходно демонстрираше дека може да дејствува и против цели што се наоѓаат длабоко под земја.
Се проценува дека оваа количина би била доволна за да се направат 10 до 11 нуклеарни бомби, но сепак важно е да се нагласи дека досега нема официјална потврда дека е донесена конечна одлука за таква операција.
