Американскиот претседател Доналд Трамп предложи буџет за фискалната 2027 година со кој трошоците за одбрана би пораснале на 1,5 трилиони долари, додека невоените федерални програми би се намалиле за 10 проценти. Белата куќа ваквиот предлог го претставува како одговор на воените ангажмани на САД, зголемените безбедносни потреби и приоритетот што администрацијата го става на армијата, граничната безбедност и одбранбената индустрија, пренесува Reuters.
Предлогот предвидува зголемување на воениот буџет за околу 500 милијарди долари во однос на претходното ниво, а во рамки на тие средства се вклучени пари за ракетниот штит „Golden Dome“, бродоградба и покачување на платите на воениот персонал за 5 до 7 проценти. Белата куќа го опиша ова како историско зголемување, споредувајќи го со периодот пред Втората светска војна.
Истовремено, администрацијата предлага кратења во низа цивилни сектори, меѓу кои зелени програми, делови од буџетот за НАСА, како и други домашни федерални трошоци што Трамп ги претставува како неефикасни или идеолошки мотивирани. Според американските медиуми, кратењата би погодиле и програми поврзани со животна средина, домување, здравство и инфраструктура.
Иако Трамп влезе во Белата куќа со ветување дека ќе го намали федералното трошење и буџетскиот дефицит, бројките засега одат во спротивна насока. Конгресната буџетска канцеларија процени дека дефицитот во фискалната 2026 година ќе достигне 1,853 трилиони долари, додека вкупниот јавен долг веќе надминал 39 трилиони долари. Новиот буџетски предлог, сепак, не отвора прашање за кратење на социјалното осигурување и Medicare, кои се меѓу најголемите федерални расходи и политички се чувствителни теми.
Предлогот сега оди во Конгресот, каде што се очекуваат силни судири меѓу републиканците и демократите. Иако дел од републиканците веројатно ќе го поддржат растот на военото трошење, демократите веќе сигнализираат отпор кон длабоките кратења на домашните програми, што значи дека конечната верзија на буџетот речиси сигурно ќе претрпи измени.
