Американскиот претседател Доналд Трамп вчера изјави дека САД би можеле да изведат дополнителни напади на стратешкиот ирански нафтен центар на островот Харг „чисто за забава“. Во исто време, тој ја намали надежта за брз мировен договор со Техеран, изјавувајќи за NBC News дека „условите сè уште не се доволно добри“.
Намалени очекувања за мир
По денот на контрадикторни пораки од Белата куќа околу времетраењето на конфликтот против Иран, Трамп тврди дека американските напади „целосно го десеткувале“ поголемиот дел од островот Харг. Тој додаде дека неговата војска би можела да ја погодат оваа локација „уште неколку пати чисто за забава“.
„Целосно го уништивме“, рече тој, додавајќи дека не биле погодени енергетските водови за да се избегне нивна долгогодишна обнова.
Трамп истакна дека иранскиот режим сака да постигне договор, но повтори дека условите за тоа сè уште не се исполнети. Тој, исто така, постави сомнеж во врска со здравствената состојба на новиот ирански врховен лидер, Моджтаба Хамнеи, прашувајќи дали „вистински е жив“.
Изненадување од иранските напади врз сојузниците
Претседателот истакна дека е изненаден што американските сојузници во Заливот биле цел на ирански напади. „Беа непотребно нападнати“, рече тој за NBC, опишувајќи ја одлуката на Иран како „најголемо изненадување што сум го доживеал во целата приказна“.
Напнатост во Ормускиот теснец
Во 30-минутниот разговор, Трамп рече дека не е јасно дали Иран поставил мини во Ормускиот теснец, кој од почетокот на конфликтот пред две недели е скоро целосно затворен. Теснецот е критичен пловен пат за светската трговија, преку кој обично минува околу петтина од суровата нафта.
Загриженоста за влијанието на американско-израелската војна против Иран врз глобалните енергетски резерви, дополнително зајакната од блокадата на теснецот, ја зголеми цената на нафтата на највисоко ниво во последните четири години, што предизвика брз раст на цените на горивата ширум светот, вклучувајќи ги и САД.
„Многу решително ќе го исчистиме теснецот и веруваме дека ќе ни се придружат и други земји за кои пристапот е отежнат или невозможен“, рече Трамп. Тој не го прецизираше времетраењето на операцијата ниту кои земји би се приклучиле на САД.
