Администрацијата на Трамп во понеделникот направи уште еден чекор и се повлече од планот за објавување на климатските извештаи на веб-страницата на НАСА, и со тоа се отежнува пристапот до главните, законски задолжителни научни извештаи за тоа како климатските промени го загрозуваат народот и државата.
Почетокот на месецов, официјалните владини веб-страници што ги хостираа националните климатски проценки — авторитетни и рецензирани документи — беа изгасени.
Тие страници наменети се за државни и локални власти, како и за јавноста, за да ги информираат што да очекуваат од климатските промени во нивната непосредна околина и како најдобро да се прилагодат. Тогаш Белата куќа соопшти дека НАСА ќе ги објавува извештаите, во согласност со законот од 1990 година што ги наложува.
Но во понеделникот, НАСА објави дека се откажува од тие планови.
„НАСА нема законска обврска“
„USGCRP (владината агенција што ги надгледуваше и претходно ги хостираше извештаите) ги исполни своите законски обврски со тоа што ги предаде извештаите во Конгресот. НАСА нема законска обврска да ги хостира податоците од globalchange.gov“, рече портпаролката на НАСА, Бетани Стивенс, во е-пошта.
Тоа значи дека ниту еден податок од извештајот или од канцеларијата што го координирала ќе биде достапен преку НАСА, потврди таа.
На 3 јули, НАСА издаде соопштение во кое стоеше: „Сите постоечки извештаи ќе бидат хостирани на веб-страницата на НАСА, обезбедувајќи континуитет во известувањето.“
Научниците реагираат: „Ова го плати народот, имаат право да го знаат“
„Овој документ е напишан за американскиот народ, платен е од даночните обврзници, и содржи витални информации што ни се потребни за да се заштитиме во климатски променет свет, како што трагично и јасно покажуваат сè поучестените катастрофи“, рече климатската научничка Катарина Хејхо од Тексашкиот технолошки универзитет и главен научник на организацијата „The Nature Conservancy“. Таа е коавтор на неколку претходни национални климатски проценки.
Иако минатите извештаи сè уште се достапни преку библиотеката на NOAA (Националната океанска и атмосферска администрација), најновиот извештај и неговиот интерактивен атлас сè уште можат да се прегледаат онлајн — но не преку НАСА.
Холдрен: „Трамп не сака луѓето да знаат“
Поранешниот советник за наука во Белата куќа под Обама, Џон Холдрен, ја обвини администрацијата на Трамп за отворено лажење и намера да ги цензурира или прикрие извештаите.
„Ова е класичен пример на манипулација,“ рече тој. „Прво нудат минимална утеха — дека НАСА ќе ги објави извештаите — за потоа, две недели подоцна, и тоа да го повлечат, без извинување.“
„Едноставно не сакаат јавноста да ја види научно проверената и темелно составена информација за тоа што климатските промени веќе прават на нашите фарми, шуми, рибарство, како и на ураганите, поплавите, пожарите и крајбрежниот имот — и како сето тоа ќе се влоши без силни мерки,“ напиша Холдрен во е-пошта.
Тој истакна дека овие извештаи се напишани на начин што е „корисен за обичните луѓе што треба да разберат како климатските промени влијаат и ќе влијаат на НИВ, нивните блиски, нивниот имот и нивната околина.“
„Трамп не сака луѓето да знаат“, заклучи тој.
Последниот извештај од 2023 година заклучи дека климатските промени веќе влијаат на безбедноста, здравјето и егзистенцијата на луѓето во секој дел од земјата — на различни начини. Малцинските заедници, особено домородните народи, често се несразмерно изложени на ризик.
