Министерката за внатрешна безбедност, Кристи Ноем, соопшти на платформата Икс дека, по налог на Трамп, ѝ наредила на Службата за државјанство и имиграција на САД да ја запре примената на програмата, пренесува АП.
„На оваа грозна личност никогаш не требало да ѝ биде дозволен влез во нашата земја“, напиша Ноем, осврнувајќи се на осомничениот, португалскиот државјанин Клаудио Невеш Валенте.
Невеш Валенте (48) е осомничен за пукањето на Универзитетот Браун, во кое загинале двајца студенти, а девет лица биле ранети, како и за убиството на професор од Масачусетскиот институт за технологија.
Надлежните соопштија дека Невеш Валенте синоќа бил пронајден мртов, со прострелна рана која, според првичните наоди, си ја нанел сам.
Според полицијата во Провиденс, Невеш Валенте студирал на Универзитетот Браун со студентска виза од 2000 година. Во 2017 година му била издадена виза за разновидност, а неколку месеци подоцна добил статус на постојан легален престој во САД, се наведува во судски документ. Засега не е познато каде се наоѓал во периодот меѓу напуштањето на студиите во 2001 година и добивањето на визата во 2017 година.
Програмата за визи за разновидност секоја година преку лотарија доделува до 50.000 зелени карти на државјани од земји со мала застапеност во имиграцијата кон САД, од кои многу се во Африка. Програмата е воспоставена со одлука на Конгресот, а се очекува дека нејзината суспензија „речиси сигурно ќе доведе до правни предизвици“.
За лотаријата за визи за 2025 година се пријавиле речиси 20 милиони луѓе, а биле избрани повеќе од 131.000 кандидати, вклучително и членови на семејствата на добитниците. По изборот, кандидатите минуваат безбедносни и административни проверки за да добијат дозвола за влез во САД. Таа година, на португалски државјани им биле доделени 38 места.
Трамп и претходно се противел на програмата за визи за разновидност. Во рамки на неговите заложби за масовни депортации, тој настојувал да ги ограничи или укине одредени законски утврдени патишта за легална имиграција, вклучително и оваа лотарија, како и правото на државјанство по раѓање. Врховниот суд на САД неодамна прифати да го разгледа неговиот приговор поврзан со тоа право.
Извор: N1info.rs
