Американскиот претседател Доналд Трамп и украинскиот претседател Володимир Зеленски се огласија по завршувањето на нивниот дводочасовен состанок во Белата куќа, кој се одржа еден ден по телефонскиот разговор меѓу Трамп и рускиот претседател Владимир Путин и најавата за нивниот претстоен самит во Будимпешта.
По средбата, Зеленски изјави дека Путин „не е подготвен за мир“, додека Трамп го изрази спротивното мислење. „Мислам дека претседателот Путин сака да го заврши војувањето,“ изјави Трамп при средбата со својот украински колега.
Ова беше третата посета на Зеленски на Белата куќа откако Трамп се врати на власт во јануари. Средбата, според двете страни, била долга и содржајна. Зеленски ѝ се заблагодари на американската администрација за „добриот и отворен разговор“ и додаде дека на масата имало многу теми за дискусија.
Во изјавата на својата платформа Truth Social, Трамп напиша дека разговорот со Зеленски бил „многу интересен и срдачен“, додавајќи дека му порачал, како и на Путин, дека „време е да се сопре крвопролевањето и да се постигне договор“. „Доста е со смртта и уништувањето. Нека и Зеленски и Путин прогласат победа, а историјата нека одлучи. Време е сите да се вратат дома во мир,“ напиша американскиот претседател.
Прашањето за проектилите „Томахок“ било меѓу главните теми на состанокот. Станува збор за оружје со далеку поголем дострел од она што моментално го поседува Украина, што предизвикува загриженост во Москва. По вчерашниот разговор со Путин, Трамп ја намали можноста САД да ѝ испорачаат на Украина вакви ракети, а Зеленски денеска одби да даде детали, наведувајќи дека „САД не сакаат ескалација“.
„Разговаравме за оружје со долг дострел, но не би сакал да навлегувам во детали. Се договоривме дека за тоа нема да даваме изјави,“ рече Зеленски, извинувајќи се на новинарите поради недостигот од одговор.
Украински медиуми јавија дека за време на состанокот Зеленски му покажал на Трамп неколку карти со „слабите точки на руската одбранбена индустрија“. По завршувањето на разговорот, украинската делегација е забележана како ги собира картите и ги внесува во возило пред Белата куќа.
По средбата, Трамп отпатува за Флорида, на своето приватно имање Мар-а-Лаго, без да се обрати пред новинарите. Истовремено, украинскиот претседател ги информираше европските лидери за текот на разговорите со американскиот претседател.
Германскиот министер за надворешни работи, Јохан Вадепфул, изјави дека претстојниот самит во Будимпешта меѓу Трамп и Путин претставува „втор обид да се убеди рускиот претседател дека е време за сериозни мировни преговори со Украина“.
Белата куќа објави и црно-бела фотографија од двајцата лидери, направена за време на состанокот, со цитат од Трамп во кој вели дека САД не се вклучени во конфликтот поради „добар бизнис“, туку „за да спасат илјадници животи“.
Извор: Index.hr
