Претседателот на САД, Доналд Трамп, објави дека следниот петок ќе се сретне со рускиот претседател Владимир Путин во американската држава Алјаска.
Официјалниот претставник на Кремљ, Јури Ушаков потврди дека самитот ќе се одржи во Алјаска. „Се чини сосема логично нашата делегација едноставно да прелета преку Беринговиот Теснец“, изјави тој, пренесе руската државна новинска агенција ТАСС. Ушаков додаде дека е можно одржување и втор самит во Москва и дека поканата за таква средба веќе му била пренесена на Трамп.
Дополнително, Трамп спомена „размена на територија“ меѓу Украина и Русија како дел од идниот договор меѓу двете завојувани земји. „Ќе има територијална размена од која имаат корист двете страни, но за тоа ќе разговараме подоцна“, рече тој во Белата куќа, додавајќи дека „тоа е комплицирано“.
„Зборуваме за територија каде што борбите беснеат повеќе од три и пол години“, истакна тој.
САД и Русија се стремат да постигнат договор за прекин на војната во Украина, што би ја зацврстило окупацијата на територијата заземена од Москва за време на воената инвазија, објави претходно Блумберг. Белата куќа ја отфрли сторијата на Блумберг, нарекувајќи ја шпекулација.
Во меѓувреме, Волстрит џурнал (WSJ), повикувајќи се на европски и украински претставници, пишува дека рускиот претседател Владимир Путин е подготвен да ја запре војната ако ја добие источна Украина.
За средбата биле разгледувани неколку потенцијални локации. Путин јавно ги спомена Обединетите Арапски Емирати, а некои опции, како Рим, би можеле да бидат проблематични поради тоа што Меѓународниот кривичен суд во 2023 година издаде налог за апсење на Путин за наводна вмешаност во киднапирање деца од Украина за време на војната. Со оглед на тоа што САД не се дел од судот, состанокот во Алјаска го избегнува тој проблем.
