Американскиот претседател Доналд Трамп побара кривично гонење на милијардерот Џорџ Сорос и неговиот син Александер, обвинувајќи ги за „поддршка на насилни протести и многу други активности низ Соединетите Американски Држави“.
Во објава на својата платформа Truth Social во средата, Трамп наведе дека Сорос и неговиот син треба да бидат гонети според Законот за организиран криминал (RICO) – федерален закон што обично се користи против членови на криминални групи. Според Трамп, поддршката од семејството Сорос за „насилни протести“ и други дејства низ земјата е доволна основа за такви обвиненија.
Претседателот дополнително тврди дека Сорос и неговите соработници, кои ги нарече „група психопати“ и „луди пријатели од западниот брег“, ѝ нанеле „огромна штета“ на Америка и дека повеќе нема да им се дозволи да ја „разоруваат земјата“. Трамп не прецизираше на кои конкретни протести мисли, но неговите изјави доаѓаат по големи демонстрации ова лето.
Во јуни, протестите против федерални рации врз имигранти во Лос Анџелес прераснаа во немири, грабежи и пожари, со судири со полицијата, стотици апсења и ангажирање на илјадници припадници на Националната гарда.
Фондацијата на Сорос, Open Society Foundations (OSF), со години финансиски поддржува граѓански и активистички групи во САД, вклучувајќи и организации поврзани со движењето Black Lives Matter и други протестни акции – некои од кои биле поврзани со насилство.
Името на Сорос неодамна повторно се појави и во контекст на аферата „Russiagate“ од 2016 година. Оваа недела, Сенатската комисија за правда објави извештај во кој се наведува дека фондацијата OSF имала врска со напорите на кампањата на Хилари Клинтон да ги промовира тврдењата за наводна соработка меѓу Трамп и Русија.
