Тешка трагедија ја потресе Тузла вчера вавечер, кога пожар избувна во Домот за стари лица во овој град во Босна и Херцеговина.
Според првичните информации од МВР на Тузланскиот кантон, во пожарот загинале најмалку десет штиценици, а околу дваесет лица се повредени и се згрижени во болници.
Телата на загинатите се пренесени во Комеморативниот центар за идентификација и обдукција. Екипи на полицијата и истражните органи се на терен, а увидот ќе биде спроведен кога ќе се создадат безбедни услови.
Пожарот избувнал на седми кат
Од Домот за стари лица во Тузла соопштија дека пожарот избувнал во 20:45 часот, на седмиот кат на зградата. Брзата реакција на пожарникарите спречила уште поголема трагедија.
„Пожарот беше ставен под контрола и изгаснат од припадници на Професионалната противпожарна единица Тузла, со поддршка од колеги од Сребреник, како и од доброволни пожарникари од Гoрна Тузла,“ наведуваат од установата.
Медицинска помош им била укажана на сите лица од загрозените катови, а повредените биле префрлени во Универзитетскиот клинички центар Тузла (УКЦ Тузла). Меѓу повредените има и полицајци, пожарникари и здравствени работници.
„Живеам на третиот кат. Кога погледнав низ прозорецот, видов запалени парчиња како паѓаат одозгора. На горните катови има луѓе кои се неподносливо болни и не можат да се движат,“ изјавила потресено штиценицата Ружа Кајиќ за BHRT.
Реакции и најави за истрага
Премиерот на Федерацијата БиХ Нермин Никшиќ изрази длабоко сочувство до семејствата на загинатите, нарекувајќи го овој настан „катастрофа од огромни размери“.
„Владата на Федерацијата ќе учествува во санација на штетата и згрижување на корисниците кои повеќе не можат да се вратат во домот. Ќе формираме тим кој ќе ги обиколи институциите за да се спречат вакви трагедии во иднина,“ изјави Никшиќ.
Премиерот на Тузланскиот кантон Ирфан Халилaгиќ и градоначалникот на Тузла во моментов бараат решение за привремен сместaj на преживеаните, а поддршка понуди и премиерот на Кантонот Сараево Нихад Ук.
„Сите наши сместувачки и медицински капацитети се на располагање. Вечерва сите сме Тузлаци. Искрено сочувство до семејствата на настраданите,“ порача Ук.
