Црна Гора е во шок и длабока тага по крвавата трагедија во Цетиње, каде 45-годишен маж уби 12 лица, меѓу кои и две деца, пред да биде застрелан од полицијата. Земјата прогласи тридневна жалост, а сите културни и празнични настани се откажани во знак на почит кон жртвите и нивните семејства.
Познати музички ѕвезди од регионот исто така ја покажаа својата солидарност, откажувајќи ги концертите и испраќајќи пораки на поддршка.
Александра Пријовиќ, српската пејачка која требаше да настапи во Бар, објави на Инстаграм:
„Поради трагичниот настан во Цетиње, вечерашниот концерт е откажан. Сочувство до семејствата на жртвите.“
Младата пејачка Анѓела Игњатовиќ – Бресквица го откажа настапот во Херцег Нови и апелираше до своите следбеници:
„Ве молам, чувајте се и слушајте ги инструкциите на надлежните. Сочувство до семејствата на настраданите.“
Од Хрватска, Јелена Розга, која требаше да пее во Тиват, порача:
„Поради трагедијата, се откажува вечерашниот настап. Искрено сочувство до семејствата.“
Еден од најголемите концерти во Будва, каде што требаше да настапат Дино Мерлин, Ади Шоше и Џек Лупино, беше прекинат веднаш по веста за трагедијата. Со емоции што допираат до сите, Дино Мерлин изјави:
„Длабоко сум потресен. Срцето ми е скршено. Мислите ми се со жртвите и нивните семејства. Боже, дај ни уште еден ден.“
Трагедијата го обедини регионот во жалост, со пораки на солидарност и емпатија кои доаѓаат од сите страни. Настанот ја потсетува јавноста на важноста на заедништвото и поддршката во моменти на загуба.
